«Jau sper che quai dettia er in di musicants per la musica»

Dapi 125 onns datti gia la societad da musica da Falera. 58 onns è Risch Cathomen gia activ en questa musica. El po sa regurdar ch'i vegniva plitost sunà tocs simpels e che las emprovas n'eran betg uschè lungas sco oz.

ch Cathomen raquinta da ses temp en la musica da Falera
Legenda da maletgs: ch Cathomen raquinta da ses temp en la musica da Falera RTR, G. Hosang

Dapi l'onn 1987 cura che la musica da Falera aveva cuntanschì in fitg bun resultat a la festa da musica chantunala a San Murezzan saja la motivaziun creschida. Ins haja dà fadia dad augmentar cuntinuadamain il nivel. La finala è la Societad da musica Falera sa participada il 2015 a la festa da musica districtuala a Sursaissa per l'emprima giada en la segunda classa.

Fin il 1978 n'haja la musica da Falera era mai gì ina atgna unifurma. Fin là saja adina vegnì cumprà unifurmas dad autras societads da musica, di Risch Cathomen. Per il giubileum da quest onn ha la societad dentant cumprà ina nova unifurma. Igl è la terza unifurma nova per la musica.

Spera ch'era ils biadis daventan musicants

Risch Cathomen è stà 14 onns president da la Societad da musica Falera. Actualmain èn ses uffants en suprastanza e tiran il char. Uschia è la figlia Heidi Casutt presidenta, la figlia Sonja Pirovino actuara ed il figl Duri Cathomen è il dirigent. «Quai fa a mai grond plaschair ch'els s'engaschan per la musica» di Risch Cathomen. Forsa saja era ses tat la culpa che la famiglia Cathomen è uschè activa en la musica. Gion Giacun Cathomen saja numnadamain stà in dals trais iniziants e l'emprim president da la Societad da musica. Interess paran era ils biadis da Risch Cathomen a mussar per la musica. Ils ins vegnian gia da dar intgins tuns: «Jau spera schon che quai dettia era in di musicants, uschia che per la proxima generaziun haja quai anc a Falera ina stupenta societad da musica».

Autur/a: RTR/sc