Jazz Festival: Culp da partenza per il 10avel

La 10avla ediziun dal Festival da jazz San Murezzan cumenza cun in concert dad Othella Dallas, Timo Lassy e da la Jazzrausch Big Band.

In placat dal festival da jazz cun in'artista e fim davostiers.
Legenda da maletgs: Dapi 10 onns concerts cun stars: il Festival da jazz San Murezzan MAD

Christian Jott Jenny, il directur dal Festival da jazz San Murezzan è arrivà pir in di avant la premiera a San Murezzan. Quai saja impurtant ha el ditg envers Radiotelevisiun Svizra Rumantscha RTR. Uschiglio dessi be memia blera agitaziun. In team da radund 50 persunas ha pisserà per tut l'infrastructura e per la tecnica. Ussa stoppian els be anc giustar detagls. Tema che in dals stars annunziads na pudess betg arrivar a San Murezzan ord x-in motiv n'ha Jott Jenny betg. Enfin ussa sajan tuts arrivads. Quai durant 9 ediziuns dal festival. Perquai duessi era funcziunar la 10avla giada.

Stars

Per la 10avla ediziun dal Festival da jazz San Murezzan datti concerts da stars sco Paolo Conte, Jamie Cullum, Herbie Hancock, Nigel Kennedy u Hiromi.

Autur/a: David Spinnler