Jenaz: La punt daventa puspè «normala»

Avant passa in onn ha insatgi colurà la punt da la Viafier retica a l'entrada da Jenaz che traversa la via chantunala mez mellen e mez blau. Ils culpants èn tschiffai – mo la punt anc adina colurada. Quai sa mida dentant proximamain.

La punt da Jenaz.
Legenda da maletgs: La punt da Jenaz. RTR, Gion Gieri Flepp

La populaziun da Jenaz ha per gronda part gì plaschair da l'acziun creativa, quai han ins sentì tar ina pitschna retschertga da RTR d'avant in onn.

La punt avess gia dapi daditg d'esser grischa. Daco ch'ella è anc adina colurada cun las colurs dal HCD, in onn e mez suenter il delict, ha in simpel motiv.

Custs da 10'000 francs

La possessura da la punt, lUffizi federal per vias ASTRA, spetga numnadamain anc adina sin ils daners da castitg dals nov culpants.

Totalmain han els da pajar ina summa da 10'000 francs.
Questa summa è partida si en duas ratas, ina da quellas è gia vegnida pajada, l'autra vegn lura pajada il mars 2017.

Pir cura che la segunda rata vegn pajada, daventa la punt puspè grischa. Quai avess da succeder durant la stad 2017. Fin lura pon ins anc admirar la punt colurada, mez melna, mez blaua.