La Punt Chamues-ch: Ils numerus fastizs da «Petrign» Laudenbacher

L'impressari ch'ès mort il onn 1993 è aunc adina preschent a La Punt e conturn.

Purtret da Petrign Laudenbacher.
Legenda da maletgs: Numerusas chasa engiadinaisas regordan anc da «Petrign» Laudenbacher. MAD

L'impressari Andreas Peter Laudenbacher accumpliss ils 23 da november 2015 ses 100avel anniversari. La fundaziun A.P. Laudenbacher envida en questa occasiun ad ina sairada in cumpagnia nua chins vul repassar la vita e sa regurdar da l'um ch'è mort dal 1993.

Cumenzà sia carriera aveva «Petrign» Laudenbacher sco coiffeur. Suenter in accident cun ses maun ès el stà sfurzà da midar professiun. Suenter avair manà plirs onns la banca a «Ponte Campovasto» sco che La Punt Chamues-ch vegnida anc numnà da quella giada, ès el sta durant plirs onns chancelier da La Punt. Dal 1956 ha Andreas Peter Laudenbacher cumprà ina resgia ed ha fundà uschia il fundament per sia firma d'impressari.

Numerusas chasas engiadinaisas a La Punt Chamues-ch e conturns regordan anc oz vi da l'agen stil che Laudenbacher aveva integrà en la construcziun da las abitaziuns. Surtut lain e crap sajan stads materials ch'el ha duvrà il pli savens tar la realisaziun da segundas abitaziuns, ha declerà sia nezza, Sonja Bannwart. Marcant e tipic per l'impressari eran surtut ils artgs or da mirs alvs e numerusas nischas, chantunins e chantunets.

Restà suenter la mort dad Andreas Peter Laudenbacher è tranter auter era la fundaziun cun la chasa Laudenbacher a Chamues-ch. En questa datti durant la stagiun auta ina giada l'emna ina visita guidada per giasts ed indigens.

In occasiun dal di da naschientscha da l'um innovativ envida la Fundaziun A.P. Laudenbacher ad ina saira in cumpagnia per sa regurdar da la vita ed ovra da «Petrign» Laudenbacher.

Glindesdi, 23 da november a las 20:00 en la sala communala da La Punt Chamues-ch
Redacziun: Anna Caprez

Autur/a: RTR/oc