Lantsch: Champ da vacanzas Don Bosco vegn remplazzà

La chasa per champs da giuvenils Don Bosco a Lantsch duai vegnir remplazzada entras in bajetg nov. Duas partidas èn interessadas. Uschia è vegnì infurmà la mesemna ad ina saira d'infurmaziun.

Ils frars Christoph ed Alexander Nadig, sco era Albert Mächler vulessan manar il nov Don Bosco
Legenda da maletgs: Ils frars Christoph ed Alexander Nadig, sco era Albert Mächler vulessan manar il nov Don Bosco (da sanester a dretg). RTR, F. Belotti

Interess da construir ina nova chasa Don Bosco han per l'ina ils frars Alexander e Christoph Nadig da Lantsch, sco era Albert Mächler da San Murezzan. Dentant ch'ils frars Nadig quintan cun investiziuns da 2.7 milliuns francs, quinta Mächler cun investiziuns da passa 2 milliuns francs. Omaduas partidas quintan cun circa 10'000 pernottaziuns ad onn. Actualmain dumbra la chasa Don Bosco radund 3'500 pernottaziuns ad onn.

Radunanza communala decida
Tgi che po la fin construir la chasa Don Bosco e manar quella en l'avegnir, vegn decidì a la radunanza communala dals 31 da mars a Lantsch. Votà vegn era davart il contract da servitut. Il contract da dretg da construcziun duai valair per 60 onns. La vischnanca po quintar cun entradas da tschains da 4'500 francs ad onn.

Don Bosco è vegnì en ils onns
La chasa Don Bosco è vegnida construida l'onn 1961 da la cooperativa per champs da giuvenils Don Bosco da Lucerna. Il 1990 ha la vischnanca da Lantsch cumprà il bajetg, e fatg il manaschi durant passa diesch onns. Dapi l'onn 2000 è la chasa dada en fittanza. Il 2010 ha il suveran da Lantsch refusà la vendita da l'immobiglia.

Autur/a: RTR/dh