Lyceum Alpinum activescha puspè «Corps of Volunteers»

Ina gruppa da scolars e magisters da la scola media a Zuoz s'engascha puspè a favur da differents projects caritativs. Gidà e lavurà vegn sut la batgetta da Peter Frehner. Tranter auter cun renovar scolas ed ospitals en Rumenia.

scolars cun giaccas cotschnas ed il rectur dal gimnasi Christoph Widmer
Legenda da maletgs: Il nov rectur dal gimnasi, Christoph Widmer, è tut inchantà da l'idea dal «corp da voluntaris». RTR, Anna Caprez

L'idea d'ina gruppa da voluntaris che s'engascha n'è betg nova. Il «Corps of Volunteers» dal Lyceum Alpinum aveva il magister da geografia, Peter Frehner da S-chanf inizià avant passa 20 onns.

Durant plirs onns è el adina puspè viagià cun gruppas da scolars e magisters en differents pajais per gidar. Gidar a realisar per exempel in nov tetg d'ina chasa da scola u er renovar parts d'in ospital.

Nov rectur dat schlantsch

Cun Christoph Wittmer a la testa dal gimnasi a Zuoz, haja dà puspè in nov vent, han declerà ils scolars che vulan s'engaschar en num da la scola. Er il manader dal project, Peter Frehner è tut intgantà dal «revival» da ses «Corps of Volunteers». El haja entant gia reactivà tscherts contacts en Rumenia, uschia il magister da geografia:

«Ils scolars na duajan betg viver mo en lur 'bubble', mabain er realisar ch'i dat anc tut in auter mund dador quel da scola», uschia il rectur dal Lyceum Alpinum, Christoph Wittmer.

Cun acziuns dal «Corp of Volunteers» na possian ins betg be mussar als scolars priviliegiads in auter mund, mabain er trair a niz las colliaziuns en val ch'i dovra cun il mastergn indigen, ha suttastritgà il rectur.

Partenza: matg 2019

Per l'emprim project ch'il «Corps of Volunteers» ha en mira en Rumenia, dettia gia ina glista da spetga tar ils scolars, ha declerà Peter Frehner. Quai saja fitg allegraivel, cunzunt cunquai che l'engaschament (nov tetg d'in stabiliment a Covasna) è previs il matg 2019, durant las vacanzas da scola. En tut fa el quint da viagiar cun var 40 scolars.

Sfida: finanzas

La pli gronda sfida per il manader dal project è adina puspè la finanziaziun da las acziuns d'agid. El haja uss la gronda lavur da reactivar tut la rait da sponsurs e gidanters che accumpognan mintgamai ils scolars ed als sustegnan cun lur savair.

Marcar preschientscha

Per attrair l'attenziun sin la lavur dal «Corps of Volunteers», ed uschia chattar sustegn per ils projects, vul l'uschenumnada «armada cotschna» (tut ils voluntaris portan giaccas cotschnas) ir la primavaira sin il Pass da l'Alvra a gidar a far urden. Emprimas tractativas cun la vischnanca da La Punt sajan gia lantschadas.

Autur/a: Anna Caprez