En la vischnanca da Medel dettia fitg paucas abitaziuns da prender a tschains e libras sajan praticamain naginas, di il president communal Peter Binz. Quai percorschian ins cunzunt sch'i dettia novas plazzas da lavur en la val ed ils lavurers na chattian betg in lieu da star. Quai ed il fatg ch'i dettia da las vischinas e dals vischins il giavisch da crear nov spazi d'abitar haja laschar vegnir activa la suprastanza communala.
Amez il vitg - in lieu ideal
La vischnanca ha discurrì cun il possessurs da l'anteriura posta, dal clavà davostiers e da l'anteriur hotel Posta per sclerir sch'i sajan pronts da laschar far in preproject per ina surbajegiada sin lur parcellas. Tenor Peter Binz è il lieu adattà per duas raschuns. Per l'ina vegnian tscherts bajetgs betg pli duvrads e giajan en decadenza, per l'autra saja il lieu central per persunas che sajan mobilas na sappian dentant betg viver en lur atgna chasa pli. La fermada da posta e la staziun sajan gist dasperas.
Da l'emprim stausch
Il terren porschia plaz per var sis fin diesch abitaziuns. La mesadad da questas duain esser adattadas per viver en la vegliadetgna. Ils preprojects che la vischnanca finanziescha e che vegnan fatgs da quatter differents architects duain esser sin maisa il schaner. Lura vegnia guardà cun ils possessurs co vinavant e tut tenor saja da tschertgar investiders.
La vischnanca sezza na vegn betg a sa participar sco investidra. Quai è tenor Peter Binz betg exnum il pensum da la vischnanca. La suprastanza saja però da l'opiniun ch'i saja lur pensum da dar il stausch necessari per metter en moviment insatge en vischnanca.
