Mustér: Chor dal dom da Cologna puspè en visita

Ch'il chor dal dom da Cologna visita puspè Mustér è d'engraziar a l'amicizia tranter il dirigent dal chor Eberhard Metternich ed Ursin Defuns, scolast al gimnasi da la claustra.

Ina totala cun els davantvart en la baselgia.
Legenda da maletgs: Chor dal dom da Cologna en la baselgia da la claustra a Mustér l'onn 2014. RTR, G.Hosang

La cordiala ospitalitad ed il grond interess demussà avant dus onns tar la participaziun dal chor al cumplet dals paders hajan fatg surstar ed era plaschì al chor da Cologna, di Ursin Defuns. Perquai hajan els fatg giu tar la visita dal chor da la claustra a Cologna ch'i duaja puspè dar ina visita a Mustér.

Uschia è il chor dals 3 fin ils 5 da fanadur puspè en la claustra da Mustér. La dumengia saira (3.7.2016 las 20.00) dat il chor in concert en la baselgia claustrala. Il glindesdi saira (4.7.2016 20.00) sa participescha il chor al cumplet, l'oraziun da la saira dals paders.


Suenter la visita a Mustér vai sco gia avant dus onns vers l'Italia a Lecco al festival internaziunal da chors «Giuseppe Zelioli». Avant dus onns ha il Kölner Domchor fatg l'emprim plaz a quai festival.