Mustér: Galaria d'art en center da sport

En ils tschalers dal Center da sport e cultura a Mustér duai dar ina galaria d'art per attrair in nov public. Ma era per porscher dapli cultura sco quai ch'il num dal center prevesa.

L'emprima stanza che duai dar plaz per exponer art.
Legenda da maletgs: L'emprima stanza che duai dar plaz per exponer art. RTR, G. Hosang

Il Center da sport e cultura (CSC) a Mustér ha ina gronda purschida da sport. La cultura è dentant preschenta plitost mo en il num. Perquai ha Antonino Di Bella, ch'è commember da la cumissiun da manaschi dal CSC, l'idea da duvrar differentas stanzas en il sutterran dal center sco galaria d'art. Las stanzas cun mirs da quadrels u betun e cun bischens che mainan atras n'èn betg gist las stanzas ch'ins s'imaginescha sco stanzas d'exposiziun per art. Quai è dentant gist quai ch'è interessant per las stanzas, ha ditg Antonino Di Bella a Radiotelevisiun Svizra Rumantscha. «Integrar insatge filigran sco art en furma da maletgs e sculpturas en talas stanzas è ina fitg bella cumbinaziun, era sch'igl è cuntravers» manegia el. Antonino Di Bella ch'è sez artist ha gia vis exposiziuns en hallas da fabricas e quai ha dà l'impuls da far diever da questas stanzas.


Galaria per artists indigens
Vid las stanzas na duess quai betg vegnir fatg bler. In zichel colur sch'i fa propi basegn, las adattaziuns pervi da la polizia da fieu e la gronda lavur è l'installaziun da chazzolas per pudair illuminar bain ils objects che vegnan exponids. Ils custs vegnan calculads cun 20'000 fin 30'000 francs. Daners che Antonino Di Bella quinta da pudair recaltgar da sponsurs. La galaria duai cunzunt dar la pussaivladad ad artists indigens da preschentar lur art al public. Tenor Antonino Di Bella è il potenzial grond. Potenzial vesa el era tar il public. Cun ina galaria pudess ins carmalar nov public en il center che faschess lura era diever da la cafetaria ubain chattas ina u l'autra purschida dal center ch'el n'enconuscha anc betg. Sch'i va tenor Antonio Di Bella duai la galaria pudair vegnir averta sin l'enviern proxim.

Uschè s'imaginescha Antonino Di Bella la galaria

Autur/a: RTR/gh/dh