Mustér: Tge capita cun la tur da zains dal vitg da vacanzas Reka?

La tur da zains sin il plaz da gieu dal vitg da vacanzas da la Reka a Mustér sto davent, ma betg ord vischnanca.

Il carillon sin il plaz da gieu da la Reka a Mustér
Legenda da maletgs: Il carillon sin il plaz da gieu da la Reka a Mustér. RTR, G. Hosang

Dapi 2013 ha il vitg da vacanzas da la Reka in nov plaz da gieu. Tar quella tutga era in uschè numnà carillon - ina tur da zains. Cun quels zains pon ins laschar resunar melodias. Questa tur na fa dentant betg plaschair a tuts, ha ditg il directur da la Reka Roger Seifritz. «Nus vain surstimà la toleranza per canera dals vischins e giasts e da l'autra vart era sutstimà la creativitad dals uffants e creschids» declera el. Uffants sco creschids chattian ora svelt ch'ins possia era laschar tutgar ils zains simplamain cun trair vid las sugas da la mecanica ch'è colliada cun ils zains. Quai è stà il crap da stgarpitsch per il carillon. Navidas hajan ins decidì che la tur stoppia davent dal plaz, ha ditg Roger Seifritz.

Tur duai restar en vischnanca
La Reka ha lura tschertgà insatgi che fiss pront da tschertgar ina soluziun per la tur, uschia che questa po restar en vischnanca. La finala è Christph Berger sa declerà pront da tschertgar ina soluziun. «Nus na pudain betg simplamain laschar ir ina tala attracziun, che nus avain gia, or da vischnanca» di il cusseglier da vischnanca e scolast Christoph Berger. Suenter ina lunga tschertga è il lieu per il carillon ussa chattà. El duai vegnir avant la chasa da tgira Puntreis. La fundaziun Puntreis avessi plaschair sch'il carillon vegniss avant lur chasa, ha ditg Christoph Berger. Uschia è la dumonda da bajegiar vegnida inoltrada tar la vischnanca.

I dovra ina massa sponsurs
Per cumprar il carillon ha Christoph Berger fundà ina gruppa d'interess. Quella va ussa a la tschertga da sponsurs per il carillon. La Reka venda il carillon, che ha custà ad ella 120'000 francs, per 50'000 francs. Sco Roger Seifritz ha ditg, hajan ins fatg in uschè favuraivel pretsch sco pussaivel per era gidar che la tur cun ils zains restia en vischnanca. Tenor Christoph Berger ston ils 50'000 francs esser ensemen fin la fin da mars per pudair salvar il carillon a Mustér. Tgi che ha interess po cumprar per 1000 francs simbolicamain in zain. Era donaziuns pli pitschnas sajan dentant bainvegnidas ha ditg Christoph Berger.

Laschar ir video «Tur da zains a Mustér disturba ils giasts da la Reka»

Tur da zains a Mustér disturba ils giasts da la Reka

1:56 min, Telesguard dals 2.3.2016

Laschar ir video «Uschia tuna il carillon»

Uschia tuna il carillon

0:41 min, dals 1.3.2016

Autur/a: RTR/dh