Mustér: «Trinitad editoriala» en l'archiv communal

Il relasch da la Stampa romontscha è vegnì surdà avant onns a la vischnanca da Mustér: Il uschenumnà Legat Condrau.

Giusep Capaul.
Legenda da maletgs: Giusep Capaul cun il tom da 1857 da la Gasetta romontscha. RTR, Hubert Giger

La part impurtanta da quest legat – fatg da l'anteriur cusseglier naziunal Giusep Condrau (1894 – 1974) – è la Gasetta romontscha. Las gasettas èn liadas ensemen en toms da mintg'onn. L'emprima è cumparida 1857. In onn avant aveva il professur Placi Condrau mess sin via quest project. Fin 1952 è la Gasetta romontscha cumparida ina giada l'emna (la gievgia), da 1952 – 1997 duas giadas (mardis e venderdis).

Gronda influenza

Ensemen cun la Gasetta romontscha furmavan il Calender romontsch ed il Pelegrin la «trinitad editoriala», sco l'anteriur redactur da la gasetta (1971 – 1990) Giusep Capaul numna quai. Quests trais avevan ina gronda influenza sin lecturas e lecturas en il senn da tgirar e promover cultura cristiana e politica conservativ-catolica. Surtut la gasetta haja gì ina influenza sco represchentanta da la partida cristiandemocrata. Cura ch'i deva votaziuns schevan els tge ch'ils lecturs stoppian votar ubain vuschar.

Pagina da Surmeier sco supplement

In aspect interessant è che la gasetta ha gì la Pagina da Surmeir sco supplement da 1946-1949. Sco Giusep Capaul di era la collavuraziun religiusa e politica tranter las duas regiuns fitg stretga, e da quest temp n'avevan ils Surmirans betg anc ina pussaivladad d'edir ina gasetta.

Part dal Legat Condrau fan tranter auter era las ritschas Tschespet ed Ischi e plirs cudeschs da litteratura e religiun.

Autur/a: rtr/hg