Nov lieu per plazza da tennis e glatsch a Savognin

Perquai che las Pendicularas da Savognin construeschan ina nova telecabina da Savognin a Tigignas la proxima primavaira, dovri ina nova soluziun per la plazza da tennis ed il glatsch. Per quels na datti nagin plaz pli, uschia che la vischnanca vul transferir ils implants da sport a La Nars.

Nov lieu per plazza da tennis.
Legenda da maletgs: Nov lieu per plazza da tennis. RTR, Federico Belotti

Sco quai che Giancarlo Torriani, suprastant da la vischnanca Surses, ha ditg envers RTR, vul la vischnanca construir a La Nars ina nova plazza da sport per radund 1,8 milliuns francs. Per la stad duai dar trais plazzas da tennis, che pon lenviern vegnir duvrads sco patinera cun glatsch artifizial. Schil project gartegia, alura duain svanir era las duas plazzas da tennis dasperas la Gelgia a La Nars. Là pudessi dar parcadis per ils sportists. Las lubientschas èn dentant betg anc avant maun. En votaziun davant la radunanza communala duess il project ir en il decurs da lauter onn. En funcziun duai la nova plazza da sport ir sin lenviern 2020/21 – lenviern avant duai vegnir fatg mo in provisori.

Club da curling beneventa plans

Il club da curling da Savognin per exempel beneventa ils plans da la vischnanca da Surses: Cun ina plazza cun glatsch artifizial saja en lavegnir la segirezza da pudair giugar pli gronda – oz saja per exempel grev da manar tras turniers perquai che las temperaturas chaudas fetschian magari in stritg tras il quint, ha ditg il president Conrad Plaz.

Autur/a: Federico Belotti