Observà dus casturs en Engiadina Bassa

Dapi ditg èsi enconuschent ch'in castur viva en vischinanza da la vischnanca da Scuol en Engiadina Bassa. La prima giada è el vegnì observà il 2008. Ussa èsi cler ch'il castur n'è betg pli sulet.

Dus casturs en Engiadina Bassa
Legenda da maletgs: Observà dus casturs en Engiadina Bassa Uffizi da chatscha e pestga GR

Casturs èn monogams, els vivan ina vita entira ensemen cun lur partenari. Per regla han els fin dus pitschens. Dacurt è vegnì observà in segund castur a la riva da l'En. Sa tracti qua d'in pèr?

La probabilitad è gronda, dus mastgels u duas femnas na sa cumportassan numnadamain betg. Tar l'emprim castur, observà l'emprima giada il 2008 è vegnì suspectà ch'el saja vegnì da l'Austria, per lung l'En. Co il segund castur è rivà en Engiadina Bassa n'è betg enconuschent.

Il dachasa dal castur, respectiv dals dus casturs en vischinanza da la centrala electrica Pradella, è bain visibel, quel sa chattia en il flum stagnà tras la centrala electrica.

Gronds donns fan ils casturs cun stagnar l'aua e cun rusignar vi da la bostga. L'aua dal En ha in quel lieu però uschè ina gronda dinamica ch'ina stagnaziun n'è betg pussaivla. La bostga en vischinanza n'è betg bostga da fritgs, mabain bostga senza gronda valur. Sch'in u l'auter bostg croda causa ils casturs n'è quai betg tragic – dimena in spazi da viver ideal per ils casturs en Engiadina Bassa.

Redacziun: Reto Mayer

Laschar ir video «Il castur a Scuol ha survegnì cumpagnia»

Il castur a Scuol ha survegnì cumpagnia

3:36 min, Telesguard dals 22.3.2017

Il castur europeic

Il castur europeic paisa tranter 23-30 kilograms, ed è circa 80 fin 100 cm lung. El viva en flums ed en vischinanza da la riva. Caracteristic è la cua dal castur, quella è platta, lada e cuvernada cun stgaglias. La cua serva per manevrar en l’aua. Il castur riva da star fin 20 minutas sut l’aua.

Autur/a: RTR/rm