Andreas Baselgia e sia dunna Barbara mainan dapi quest onn en quarta generaziun il hotel Greina a Rabius. La decisiun da vender uss la sala dasper l'hotel è ina decisiun economica. Uschia na renda la sala betg pli sco ils onns 90 nua che quai deva quasi mintga fin d'emna ina nozza en questa sala. Uschia han fin a 120 persunas plaz en la sala. Era ha il bab dal ustier actual, Duri Baselgia, cumprà la sala la fin dals onns 80 e bajegià ina cuschina nova tranter il bajetg dal hotel e la sala tradiziunala.
Ma la tradiziun gronda aveva il teater
Dapi il 1911 è vegni fatg teater en la sala dal hotel Greina. Uschia datti quatter maletgs cun ils quatter reschissurs ch'han manà si tocs en la sala. Ma cura che la scola nova a Rabius ha avert sia portas il 1963-64 ha la sala pers si'impurtanza per la vita culturala dal vitg da Rabius. Era teater è vegni fatg sulet fin il 1969 en la sala dal hotel Greina, uschia ch'era luniun dramatica da Rabius ha midà sias producziuns si en la halla da la chasa da scola.
Chattar in cumprader per la sala è grev
Tant l'anteriur possessur Duri Baselgia sco era ses figl Andreas Baselgia vesan ch'ì n'è betg simpel da chattar in cumprader per la sala. Era la vischinanza tar l'hotel saja da ponderar, uschia na duai in niz nov da la sala betg disturbar il manaschi dal hotel, di Duri Baselgia. La meglra schliaziun fiss la cumpra tar il maun public. Ma en la vischnanca da Sumvitg datti gia blers bajetgs en possess da la vischnanca libers, uschia ch'ina tala cumpra è era per ils Baselgias betg propi realistica. Ma era da renovar la sala, ni quai bajetg na saja betg pussaivel, tut quai che vegnia investì da nov en il bajetg na possia betg pli vegnir amortisà tras entradas, accentuescha tant Andreas Baselgia sco era Duri Baselgia.
