Siglir tar il cuntegn

Header

audio
Il chastè da Tschanüff è prest renovà
RTR, Georg Luzzi
laschar ir. Durada: 2 minutas 46 Secundas.
cuntegn

Ramosch: La renovaziun dal chastè da Tschanüff – ultima etappa

Ina da las pli grondas ruinas dal chantun Grischun – il chastè da Tschanüff - retschaiva si'ultima etappa da renovaziun. La finamira è da mantegnair las miraglias imposantas gist en vischinanza da Ramosch.

L'istorgia scriva l'onn 1256, quai onn è il chastè da Tschanüff vegnì construì. Entras in'emprova dendrocronologica vegn datada quel anc 300 onns pli vegl. Il chastè da Tschanüff è vegnì ars u devastà quatter giadas, l'ultima giada l'onn 1622 tras in regiment Glarunais. L'onn 1780 è il chastè definitivamain vegnì bandunà e dapi lura surlaschà a la natira.


Fundaziun Tschanüff

La fundaziun Tschanüff è vegnida fundada l'onn 2001 cun la finamira da segirar las miraglias da l'erosiun ed uschè er mantegnair in'impurtanta istorgia da la fracziun da Ramosch (Valsot). Trais etappas èn gia realisadas, 1.1 milliuns francs han custà quellas trais, la quarta stat curt avant. 750'000 francs èn previs d'investir. In terz da la summa paja il chantun, in terz vegn fatg en furma da lavurs dals giarsuns da miradurs Grischuns ed il terz terz en furma da donaziuns. Il 2018 cumenzan alura las lavurs da restauraziun.


Plantar raras plantas datiers da la ruina


L'iris melna sgiagliada (schmutziggelbe Schwertlilie) crescha anc oz en las paraids da crap en vischinanza da la ruina, ina flur che creschia unic en quest lieu en Svizra. Sper quella chattan ins anc la genista stailada (Kugel-Ginster) ina flur ch'ins chatta sulettamain anc en il Valais. Era quai è in'impurtanta part da l'istorgia dal chastè da Tschanüff.

Dapli da «Total local»

Scrollar a sanestra Scrollar a dretga