San Murezzan: Bilantscha 150 onns turissem d'enviern

Durant 5 mais han gì lieu en l'Engiadin'Ota differentas occurrenzas enturn il sport e turissem d'enviern. Quai per festivar il cumenzament dal turissem d'enviern l'onn 1864 a San Murezzan e ses pioniers.
Quests dis han lieu las ultimas occurrenzas en connex cun il giubileum. Gia ussa ha il comité d'organisaziun fatg bilantscha. Igl è ina bilantscha positiva. Ins haja cuntanschì dapli che pensà e gì in eco fitg grond sur ils cunfins svizzers ora en differents pajas. Positiv saja sur tut che tut las organisaziuns sur hotellaria, pendicularas, destinaziun e privats tuts han lavurà ensemen. In spiert che stoppia restar viv, uschè il president dal comité d'organisaziun, Hans Ruedi Schaffner.