Savognin: Berto Tanner va en pensiun

Sco quai che Berto Tanner ha ditg, sa legria el sin la pensiun, era sch'el haja manà la scola cun grond plaschair. Gia il proxim enviern veglia el puspè entschaiver a dar scola da skis, ils davos 18 onns na saja quai betg pli stà pussaivel ord mancanza da temp. Durant ils 18 onns ch'el ha manà la scola da skis, haja quai dà differentas midadas en la scola da skis. In dals gronds svilups saja stada la renovaziun dal Club da Pinocchio, u era il nov tarpun magic a La Nars, ch'haja fatg pli simpel als uffants d'ir ensi. Il pli grond plaschair haja el adina gì, cura ch'el haja pudì reparter lavur a tut sias scolastas e scolasts da skis. Durant il temp ch'el è stà il mainafatschenta da la scola da skis, haja el adina gì enfin 100 scolastas e scolasts da skis. Dentant che pli baud vegnivan anc blers creschids en la scola da skis, sajan oz 90% dals visitaders da la scola da skis uffants, uschia Berto Tanner.