Savognin: Sanaziun gronda per il Punt Crap

A Savognin vegn actualmain sanà il Punt Crap, ina punt sur la Gelgia, che colliescha las duas varts da la vischnanca. Sco quai che Patric Vincenz, il president communal da Savognin ha ditg, muntan ils custs a 560'000 francs.

Vista sin Punt Crap.
Legenda da maletgs: Gronda sanaziun da Punt Crap. RTR, F. BELOTTI

Las lavurs da construcziun cuzzan bun trais mais e duain esser terminadas anc avant l'atun. Da nov survegn il Punt Crap era ina sulada che va enfin tar la plazza Grava. Tenor Patric Vincenz saja la restauraziun da la punt stada urgenta, cun quai che aua haja adina donnegià pli ferm la punt, e la davosa restauraziun saja vegnida fatga ils onns 70. Las lavurs da sanaziun da la punt duain esser a fin mez da fanadur. Las lavurs da far la sulada pudessan anc cuzzar in pau pli ditg, uschia il president communal da Savognin.

Autur/a: RTR/cl