«Sche quacs e giats sa tschentan en las tarpas èsi finì»

Quest onn po la secziun da chatschaders Vallatscha Medel/Lucmagn festivar il giubilem da 75 onns. En quest connex ha la secziun organisà ina exposiziun da chatscha; e quella mussa er buis e traplas da Luis Giger.

Luis Giger
Legenda da maletgs: Luis Giger RTR, Hubert Giger

Dapi 60 onns va Luis Giger da Pardé a chatscha. E dapi quatter decennis va el era a chatscha la notg sin vulps e fiergnas. Lemprima buis da tgiet haja el survegnì da Maurus Venzin dad Acla, e lez veva ella dad in um da Mustér. El sa regorda chel haja sajettà ina da sias emprimas vulps en Val Cristallina.

Quacs e giat en la trappla


Oz èsi scumandà da sajettar cun talas buis da tgiet. Scumandà èsi era da metter traplas per pigliar vulps e fiergnas. Luis Giger ha dentant era fatg experientschas spezialas cun traplas, vul dir: mintgatant ha el piglià auters animals che quai chel vuleva. El raquinta da dus cas chel aveva piglià dus quacs ed in giat. Ils quacs aveva el piglià cura chel gieva a pavlar si Tscheps sur Acla. Il giat d'ina famiglia da Platta era vegnì en la trapla chel aveva tschentà a Sumsais. Dapi lura haja el ditg a sa sez: finì cun traplas.


200 vulps e fiergnas

Sco il chatschader dad 82 onns di, haja el piglià da quai da 200 vulps e fiergnas. Uss sajetta el dentant mo pli cun la buis cun perspectiv (era numnà zetef). Ed el haja cumenzà a sajettar ord fanestra da sia cuschina.

Autur/a: Hubert Giger