Scuol: Pop-up store - butia ch'exista mo per in temp

Claudia Knapp ha avert per trais emnas in pop-up store a Scuol. In pop-up store è in local ubain ina tala butia ch'exista mo per in temp limità.

Claudia Knapp en ses pop-up store
Legenda da maletgs: Claudia Knapp en ses pop-up store RTR, Dario Müller

En il local da Claudia Knapp chatt'ins spezialitads da l'Italia. Ieli d'ulivas ch'ella producescha sezza sin ses bain en la Liguria, Italia. Ma er auters products d'auta qualitad da differents producents talians fa ella amogna.

L'onn 2012 ha ella cumprà il bain en l'Italia e dapi dus onns fa ella sezza ieli d'olivas, dentant betg uschè bler ch'ella pudess entrar en il martgà. Ella venda ils products online e durant il temp da Nadal e Bumaun er en il pop up store. Quai saja d'ina vart ina bun'occasiun per preschentar ses products e da l'autra vart da dar vita ad in local vid, er sche tut quai dura mo trais emnas. Ina butia durant l'entir onn na rendess betg, di Claudia Knapp.

Laschar ir video «Il Pop Up Store da Claudia Knapp è avert be in temp limità»

Il Pop Up Store da Claudia Knapp è avert be in temp limità

2:42 min, dals 3.1.2017

Autur/a: Violanta Rominger / Sandra Carisch