Silvaplauna ha finalmain ina plazza communala

Durant 155 dis è ella vegnida construida, questa fin d'emna è stada l'inauguraziun da la nova «Plazza dal Güglia».

Il bigl è il center da la nova plazza communala da Silvaplauna
Legenda da maletgs: La nova plazza communala da Silvaplauna straglischa. RTR, Riccarda Müller

Onns a la lunga èn tschients d'autos e camiuns passads quasi di e notg tras la vischnanca da Silvaplauna. Ed onns a la lunga ha la vischnanca cumbattì per in sviament. Questa stad è il sviament finalmain vegnì avert. Dapi lura passa il traffic tras in tunnel e betg pli tras vischnanca.

Il di suenter l'avertura dal tunnel han ils da Silvaplauna cumenzà a construir lur nova plazza communala. Per 5,35 milliuns francs è la plazza tranter la banca e l'anteriur hotel Julier Palace vegnida construida.

Inauguraziun cun gronda festa

La sonda, duas emnas suenter che la plazza è stada construida a fin, è la nova «Plazza dal Güglia» vegnida inaugurada cun ina gronda festa per la populaziun.

L'illuminaziun da Nadal, ils bostgins enturn la plazza e las chasinas da vendita sco tar in martgà da Nadal ma era las diversas gruppas da musica han dà in rom festiv a la festa. Il punct culminant è per ils blers stà il concert dal cor viril «Heimweh».

Dar vita a la plazza

La gronda sfida saja uss da dar vita a la plazza, da quai èn ils da Silvaplauna sco era il president communal Daniel Bosshard conscients. Perquai saja vegnì fundà in «think tank», ina gruppa da lavur creativa che duai rimnar e discutar ideas. Pussaivel fissan teaters, concerts, martgads u autras occurrenzas ch'envidan la glieud a s'inscuntrar.

Autur/a: Riccarda Müller