Sur En: Cun ils patins tras il guaud

Sur En, ina fracziun da la vischnanca da Scuol, porscha in'aventura tut speziala: spassegiar cun patins tras il guaud. Radund trais kilometers lung è il traject.

Via da patinar a Sur En
Legenda da maletgs: Via da patinar a Sur En RTR, Georg Luzzi

Ils da Sur En tiran a niz il glatsch a differentas manieras. Sper la plazza da giugar a tschoccas ed il clutger da glatsch per rampignar datti anc in traject per spassegiar cun ils patins tras il guaud.
La pitschna fracziun da Sur En sa chatta a dretga da l'En. Durant il december na datti strusch sulegl en questa regiun – cundiziuns idealas per producir glatsch.

Per realisar il traject vegn fatga naiv artifiziala, quella vegn transportada cun in tractor. Ina maschina da far pista prepara la pista e lura suonda in ulteriur tractor che maina l'aua sin la pista.

Gist al lieu pon ins fittar ils chalzers da patinar ed ina chapellina, e lura cumenza l'aventura. Il traject maina tras il lung guaud al flum, ina giada amunt e lura puspè aval. In'attracziun per tuts che charezzan il patinar.

Autur/a: Georg Luzzi