Surrein: Nova orgla per la baselgia

La plaiv da Surrein ha decidì da cumprar in'orgla nova. Perquai sto l'orgla veglia l'emprim vegnir demontada. L'orgla nova n'è dentant betg cumplettamain nova.

Nova orgla da Surrein.
Legenda da maletgs: Il construider d'orglas Peter Kraul prenda dapart l'orgla da Surrein. RTR, G. HOSANG

Ins pudess dir che l'orgla en la baselgia da S. Placi a Surrein tgulava or da tuttas rusnas. Quai fascheva fastidis als da Surrein, declera il president da la cumissiun per l'orgla nova, Retus Giger. «Il problem è che durant messa tuttenina tschivla in register e nus na savain betg pli co remediar questa situaziun. Quai ha lura era la fin finala manà tar la decisiun da midar l'orgla», declera l'organist e dirigent dal Chor maschadà da Surrein. Las midadas da temperatura en baselgia n'han dentant betg mo fatg che l'aria ch'i dovra per sunar l'orgla na va betg adina là nua ch'ella duess, mabain era che la mecanica sco tala ha patì. Sco il construider d'orglas Peter Kraul di, hajan ins adina puspè fatg reparaturas e latiers hajan ins stuì improvisar.

Orgla è gia 125 onns veglia
Gia da l'entschatta davent hai gì num improvisar. L'orgla è numnadamain stada var 60 onns en la baselgia parochiala da Mustér. 1951 ha la plaiv da Surrein cumprà quest'orgla e laschà bajegiar ella en baselgia da Surrein ch'è pli pitschna. Per che quai funcziunia hajan ins lura stuì adattar l'orgla. L'anteriur organist Robert Deplazes sa regorda anc che l'orgla na funcziunava l'entschatta betg uschè bain. I haja duvrà in temp fin ch'ins haja propi chatta da lez temp il problem.

Prest in'orgla nova
L'orgla nova custa a la plaiv da Surrein 270'000 francs. Sco quai che Retus Giger di èsi dentant stà impurtant che las fifas da l'rgla veglia vegnian salvadas. «Quai è in'orgla speziala cun bels tuns. Tuns loms e chauds», di Retus Giger. Per accumpagnar il chor ed il pievel saja quai pli bel ch'ils tuns da las orglas novas che tunian pli direct, declera el vinavant. Perquai vegnan las var 1000 fiffas transportadas en il lavuratori da Peter Kraul a Schwende (Germania). Là vegnan quellas restauradas e bajegiadas en l'orgla nova. Quella survegn era ina nova cumparsa. Sco Peter Kraul ha ditg dettia quai in'orgla pli schlanca e gracila. Ella vegnia fatga ord lain da fraissen. Il lain vegn auter che tar l'orgla veglia betg colurà, mabain restia natiral. Quai fetschia era ina pli bella parita che la colur verda dad ussa, manegia Peter Kraul.

Sch'i va tut tenor plan, lura resuna l'orgla nova cun las veglias fifas da Paca 2017.

Laschar ir video «Robert Deplazes sa regorda co quai è stà avant 65 onns»

Robert Deplazes sa regorda co quai è stà avant 65 onns

1:58 min, dals 3.3.2016

Autur/a: RTR/cl