Teater Sent: Nagins problems da chattar acturs giuvens

En la vischnanca da Sent vegn giugà teater. Giuven e vegl è da la partida cun plaschair e fascinaziun. En blers lieus mancan però oravant tut giuvnas e giuvens teatrists – ma betg a Sent.

Ils acturs da la gruppa da teater exerciteschian sin la tribuna
Legenda da maletgs: La gruppa da teater exerciteschian il toc Earnest RTR, G. Luzzi

La giuvna actura Laura Salomon è fascinada da giugar teater. Cun ses 18 onns è ella la pli giuvna, cun distanza. Las primas experientschas ha ella fatg cun giugar pitschens teaters durant il temp da scola.

«Teater è sco adrenalin – sco far in sport extrem», di Laura Salomon.

Il prim ha ella giugà be rollas pitschnas, ma bainbaud ha ella surpiglià er rollas impurtantas. Actualmain dat la societad da teater Sent il toc «Earnest» dad Oscar Wilde. Laura Salomon è la marusa da Earnest. In toc, che mussa il spievel da la classa bainstanta enturn il 1900.

Grazia al grond engaschament da Madlaina Rauch, ch'è sezza actura e reschissura, ha Sent adina puspè chattà giuvnas e giuvens che giogan teater cun plaschair e fascinaziun.

Redaziun: Georg Luzzi

Curta descripziun dal teater

Tar il toc «Earnest» sa tracti da l’istorgia «The Importance Of Being Earnest» da l’autur Oscar Wilde. In toc che mussa il spievel da la classa bainstanta enturn il 1900. Il giuven Earnest, che viva en la champagna, inventa in frar. Uschia po el esser in’autra persuna en il temp ch’el viva en citad. Earnest o Jack co el avess vairamain num, emprenda d’enconuscher in ami che fa in gieu sumegliant. E lura vegn anc vitiers l’amur per ina bella giuvna. Tut quai procura per bain inqual confusiun.

Autur/a: RTR/Georg Luzzi