La dumonda da construcziun è stada publitgada ed i n'ha dà nagins recurs. Ussa sto anc il chantun Grischun dar glisch verda. Sco Rita Wolf dal cussegl d'administraziun ha ditg a Radiotelevisiun Svizra Rumantscha, vegnan las lavurs scrittas ora proximamain. Planisà èsi da cumenzar cun las lavurs per il nov bajetg principal la fin da fanadur/entschatta d'avust. Uschia dettia quai il pli pitschen disturbi pussaivel per ils giasts dal campadi. Avant che la naiv vegnia l'atun, quintan ins dad esser uschè lunsch ch'igl è mo pli da far las lavurs endadens.
Il bajetg existent vegn stgarpà giu la primavaira 2016 ed en quest lieu vegn in nov bajetg cun indrizs sanitars bajegià. Rita Wolf quinta che tut saja pront per la stagiun da stad 2016.
Chattà in manader per l'ustaria
Eberhard Hagmann da Cuira vegnia a surpigliar questa stagiun l'ustaria. El enconuschia il campadi perquai ch'el saja dapi intgins onns giast dal campadi, di Rita Wolf. Il contract valia per la stagiun da stad. Sche omaduas partidas sajan cuntentas, possia quel vegnir prolungà.