Trun: Cultura en la sculptura dovra forza electrica

Avant trais onns ha la «Surselva Plus» cumenzà cun ina retscha da concerts ed eveniments cun il num «cultura el liug».Uschia han els era fatg enconuschent la sculptura Ogna da Matias Spescha.

La sculptura sezza na dovra betg electricitad, ella funcziunescha cun la sumbriva.
Legenda da maletgs: La sculptura sezza na dovra betg electricitad, ella funcziunescha cun la sumbriva. RTR, Linus Livers

La sculptura Ogna è pli e pli dumandada sco plaz per eveniments culturals. Questa saira datti puspè uschia ina concert u forsa meglier ditg in experiment cun tuns e glisch: Andi Schnoz e sia furmaziun èn d'udir e vesair en la sculptura Ogna.

Per quest eveniment dovran els dentant in agregat da far forza electrica. La sculptura n'è numnadamain betg colliada cun la rait da forza electrica. Quai è ina situaziun che cuntenta adina pli pauc - cunzunt cun quai che l'Ogna davent vi e pli attractiva per eveniments culturals.

La sculptura sto restar sculptura
Il vice president da la Fundaziun Ogna, Donat Nay è conscient ch'el ha da survegliar in bischu, ed el vesa era il basegns da schliar il problem ch'igl ha betg electricitad en la sculptura. Ma sco Donat Nay di, saja d'ir enturn precaut cun quest giavisch, la sculptura da Spescha sto restar en emprima lingia sculptura. Ussa saja dentant uras ch'i vegn messa ina lingia da forza electrica en l'Ogna.

Las pussaivladads per colliar la sculptura cun la rait electrica
Nay vesa duas pussaivladads per far quai. Ina giada pudess ins nizzegiar la chaschun che la via gist dasperas vegn sanada, lautra pussaivladad è, ch'il campadi a Trun vegn ad illuminar ses nov parcadi e quel sa chatta en la vischinanza da la sculptura Ogna, uschia ch'ins savess era far ina colliaziun cun in cabel.

Donat Nay quinta che la fundaziun Ogna vegnia da schliar quest problem pervia da la forza electrica. Fin ussa devi trais fin quatter eveniments ad onn en l'Ogna - in pèr dapli pudessi senza auter vertir, manegia Donat Nay.

Autur/a: RTR/ll/fb/ij