Trun: Dumeni Tomaschett – «Il Bambin è vegnì tar nus»

In mez milliun ha il chantun da Turitg sponsurà a la vischnanca da Trun per la sanaziun da la via da guaud da Munt.

Dumeni Tomaschett.
Legenda da maletgs: Dumeni Tomaschett dastga per propi traglischar pervi dal grond regal che Trun ha survegnì. RTR, Gion Hosang

La surpraisa haja quai dà gist avant Nadal, di il president communal Dumeni Tomaschett. Tranter las chartas cun buns giavischs per Nadal e Bumaun sa chattava era ina brev dal Padrinadi da vischnancas da muntogna. En quella saja el vegnì infurmà ch'il chantun Turitg dettia or dal fond da lottaria 500'000 francs per la sanaziun da la via da guaud che maina sur Trun siadora a Munt.

Levgiament per cassa communala

La sanaziun ed il schlargiament da la via custa en tut 7,4 milliuns francs. La gronda part paja il chantun, la vischnanca ha dentant anc adina da surpigliar var 1,5 milliuns. Perquai saja la vischnanca sa drizzada al Padrinadi da vischnancas da muntogna. Quella organisaziun è lura sa messa a la tschertga da daners ed ha chattà quels tar il chantun Turitg. Lez da sia vart sustegna territoris cun finanzas flaivlas en il Grischun, Tessin, Uri e Vallais. Il project da Trun ha correspundì als criteris ed uschia ha quai dà questa summa. Tenor Dumeni Tomaschett levgescha quella fitg las finanzas da la vischnanca, che prevesan quest onn in deficit da 250'000 francs.

Sco engraziament vegn la regenza da Turitg envidada questa stad a far ina visita a Trun, declera Dumeni Tomaschett. Uschia possia la regenza turitgaisa era guardar nua ch'ils daners ch'els han dà vegnian investids.

Autur/a: Gion Hosang