Tujetsch ha in nov local da restauraziun

I na sa tracta betg d'ina ustaria usitada. Perquai ha il local num cuschina e betg ustaria, decleran Mengia Monn ed Erwin Braunhofer. Mangiar pon ins là da mezdi u la saira, ma be sin empustaziun. Ils dus ustiers cuschinan lura il menu per lur giasts. «Nus n'avain betg in stil da cuschina specific», declera Erwin Braunhofer. «Nus cuschinain quai che nus mangiassan er gugent sche nus giessan a mangiar ordaifer».
L'ustaria è en lur atgna chasa, en las localitads d'ina scrinaria che na vegniva betg pli duvrada. L'idea avevan els gia daditg, ma i haja duvrà in zic temp per realisar ella, di Mengia Monn. I saja er stà ina sfida da prender il maximum pussaivel or da las anteriuras localitads.