Val Medel: Emprims avantatgs cun «La Caura»

L'Alp Puzzetta en Val Medel è stgargiada. Las 270 chauras èn puspè a chasa.

L'Alp Puzzetta sin 1860 m.
Legenda da maletgs: L'Alp Puzzetta sin 1860 m. RTR, H. GIGER

Sco il signun ha ditg ad RTR saja quai stà ina buna stad. El haja chaschà 1'600 kg. Ina part dal chaschiel, 150 - 200 kg, ed era charn-chaura survegnan ils commembers da l'uniun «La Caura».

Purs cuntents cun La Caura
Ils dus purs da Medel che han gì lur animals sin l'Alp Puzzetta èn cuntents cun il project «La Caura». Placi Venzin da Curaglia ha gì 35 chauras sin l'alp. L'avantatg da l'uniun saja ch'els cumprian in tschert quantum chaschiel ; e ca. 600 kilos hajan els vendì direct.
Dominik Waldmeier (el e sia partenaria Eveline Hauser fan trekking) ha gì 9 chauras sin l'alp. La Caura saja ina gronda schanza e motiveschia da cuntinuar.

Dapli chauras sin l'Alp Puzzetta
Nina Pfaff che maina il project en favur dal guaud da muntogna (ensemen cun il persunal e voluntaris è ella responsabla per l'Alp Puzzetta) giavischass ch'i dess dapli chauras. Ed il signun Christoph Pally di ch'els pudessan producir il dubel e navessan betg problems da vender il chaschiel. Chaschiel-chaura saja in product fitg tschertgà.

L'uniun La Caura datti dapi l'avust 2014. La finamira è da mantegnair e promover ils products da quest animal en Val Medel.

Autur/a: RTR/hg