Valendau: Acziun da sponsoring dals «Ruinaulta Devils»

Dapi sia fundaziun fa il club dad unihockey da Valendau, ils «Ruinaulta Devils», sponsoring da gol. Quest onn è quest'acziun era online. Uschia spera il club dad avair dapli annunzias e cun quai era dapli sponsurs. Il dumber da participants va numnadamain dapi intgins onns mo engiu.

In bun concept da sponsoring è l'A ed O per in club da sport
Legenda da maletgs: In bun concept da sponsoring è l'A ed O per in club da sport keystone

L'onn 2008 è vegnì fundà il club dad unihockey «Ruinaulta Devils». Per pudair finanziar lur gieus, tricots ed auter han els cumenzà a far in uschenumnà gol-sponsoring. Ils commembers han repartì scrits e tgi che vuleva pudeva s'annunziar. Ils emprims onns eran quests scrits plainischems, ma cun il temp aveva il club adina pli paucs interessents. Per pudair derasar meglier quest'acziun, han ils «Ruinaulta Devils» mess l'acziun online cun la mira da puspè avair uschè bleras annunzias sco avant tschintg, sis onns.


Nagin effect
Bain che l'acziun è vegnida derasada, munta l'effect a nulla. Stgars diesch persunas èn s'annunziadas, 100 era la mira. Pertge cha quai è uschia po era la presidenta dals «Ruinaulta Devils», Nicole Alig be supponer. I pudess esser, che memia paucs commembers han derasà l'acziun.

Consequenzas
Sche l'acziun cuntinuescha uschia, sto il club chalar l'onn che vegn cun quest gol-sponsoring. Malgrà ch'il gol-sponsoring era adina in bun sustegn supplementar, n'èn els betg pli dependents da quest'acziun. Il club na va dimena betg en las cifras cotschnas. Ma en il futur possia esser, ch'ils commembers hajan da pajar ina contribuziun annuala pli gronda.

Tge è in gol-sponsoring insumma?
Tar in gol-sponsoring pajan ins per mintga gol in tschert import. Quant aut che quel è pon ins decider sezs. A la fin da la stagiun survegnan ins lura il quint. Exempel: Jau vul pajar 2 francs per mintga gol. La squadra da umens e quella da las dunnas fan ensemen 178 gols en l'entira stagiun. Lura sponsuresch jau al club dimena 356 francs.

 

Autur/a: Flurin Clalüna