Vuorz: Turtas giganticas

Avant in onn e mez ha Gabi Schwieger avert il café dal vitg a Vuorz. La spezialitad èn turtas da groma en il stil american.

Purtret da Gabi Schwieger.
Legenda da maletgs: Gabi Schwieger. RTR, C. Albin

Suenter curt temp è il café dal vitg gia fitg enconuschents en l'entira regiun. Il motiv èn las turtas da groma da Gabi Schwieger. Grondas turtas en il stil american, ch'ella fa ord products indigens. Far turtas è la gronda passiun da la dunna da 46 onns. La turta cun mousse da tschigulatta saja sia turta preferida. Emprais quai ha ella da sia mamma. In emprendissadi sco conditra n'ha ella mai fatg.

Gastronomia en il sang
Naschida è Gabi Schieger 1969 datiers da Berlin sco feglia d'in pur. Sper il puresser manavan ses geniturs anc ina pitschna ustaria ed ella haja passentà sia uffanza en quella ustaria. Ina lavur ch'ella haja charezzà. Perquai ha ella era fatg l'emprendissadi sco spezialista da restauraziun en in restaurant da 5 stailas a Berlin. Suenter l'emprendissadi è ella anc sa scolada vinavant.

Dapi 2010 en Svizra
L'onn 2010 è Gabi Schwieger sa decidida d'emigrar en Svizra. Sco educatura suletta cun dus uffants vuleva ella porscher in meglier futur als uffants. Suenter ch'ella è stada in onn a Son Gagl, ha ella cumenzà ina plazza en in hotel a Breil. Sin la stagiun d'enviern 2011/12 ha ella pudì surprender la gestiun d'in restaurant en il territori da skis.

Ristgà il pass en la independenza
Suenter 3 onns ha ella ristgà da far il pass en l'independenza. Gabi Schwieger ha fittà l'anteriur café Bertogg a Vuorz e ha avert ses agen café, il «café dil vitg». La strategia è simpla: crear in'atmosfera empernaivla e cordiala e lavurar cun products indigens. Quella strategia haja funcziunà davent da l'entschatta.

Autur/a: RTR/al