Far bogn cun t-shirt - toleranza per rituals esters

Giasts giudaics duain far la duscha avant che far bogn, quest appel d'in hotel ad Arosa ha chaschunà questa stad bleras irritaziuns e malaveglia. Cas sco quel d'Arosa èn rars, ma malchapientschas e conflicts tranter persunal d'hotel e giasts d'autras culturas e religiuns datti savens. Per evitar malempernaivladads vul ins meglierar la chapientscha vicendaivla. Ad Arosa datti en il decurs da l'october curs da sensibilisaziun per il persunal d'hotel che infurmeschan dad usits e disas giudaicas. Ma er la Federaziun da plaivs israelita ha lantschà campagnas da sensibilisaziun. Tut quai cun la finamira da chapir meglier in l'auter.

Redacziun: Gabriela Desax