Il cuvel da Ziràn

Quai ch'è capità a Ziràn avant 1'500 onns è in veritabel crimi che lascha avert bleras dumondas.

Sche uffants èn en tschertga da stgazis, poi esser ch'els chattan davairas rauba misteriusa. Uschia è quai capità l'onn 1990 en in cuvel a Ziràn. Pliras exchavaziuns han alura purtà a la glisch chats da tut gener: vaschella per celebrar cults, munaida, cristals e skelets. Quels chats han pudì dar indizis davart la convivenza tranter ils emprims cristians e la populaziun pajauna a Ziràn.

Il cuvel da Ziràn è documentà en l'exposiziun actuala «Il fund» en il Museum retic a Cuira. Quest'exposiziun preschenta in u l'auter object e dat scleriment ad intginas dumondas dal cuvel misterius da Ziràn.

Litteratura:

  • Il fund. 50 onns Servetsch archeologic dal Grischun. Ediziun speciala da As. Archäologie Schweiz, 40.2017.2.
  • Liver, Alfred e Rageth, Jürg: Neue Beiträge zur spätrömischen Kulthöhle von Zillis – Die Grabungen von 1994/95, ord: Zeitschrift für Schweizerische Archäologie und Kunstgeschichte, carnet 2, 2001, p. 111-126, online: http://bit.ly/2rSgKAs
  • Rageth, Jürg: Ein spätrömischer Kultplatz in einer Höhle bei Zillis GR. Separatdruck aus Zeitschrift für Schweizerische Archäologie und Kunstgeschichte, tom 51, carnet 3, 1994.

Autur/a: Donat Caduff