Il stgazi da la catedrala ed il tinghel-tanghel politic

Tge propi è il stgazi da la catedrala da Cuira?

Dad aur e da taila èn las custaivladads dal stgazi da la catedrala da l'uvestgieu da Cuira. Dad aur èn per exempel las mesas statuas da Son Gliezi e Son Flurin, ils dus patruns da l'uvestgieu. Da taila persuenter è il fragment d'ina tastga da reliquias sirica da radund 800 s.C.

Dapi l'onn 2002 sa chatta il stgazi en il local da protecziun dal Museum retic.

Per mussar questas preziusadads a la publicitad è stà planisà da far in museum en il chastè da l'uvestg. Ma l'uvestgieu ha sistì ils plans, damai ch'il cussegl communal da Cuira ha decis da betg sustegnair il museum cun 600'000 francs.


Tuttina datti anc speranza per il museum: Forsa vegn il cussegl communal a decider anc ina giada en il rom da la debatta da budget dals 14 da december.

Ensemen cun il stgazi vegnissan en il nov museum er mussadas las 17 tavlas da la mort da l'onn 1543.

Vita e cretta ha gì la pussaivladad dad ir a guardar las preziusadads da l'uvestgieu da Cuira. Lur fascinaziun religiusa, lur muntada culturala ed il tinghel-tanghel politic vegnan ad esser tema questa dumengia.

Il pled sin via da l'emprima dumengia d'advent fa il reverenda Magnus Schleich.

Redacziun: Rafael Müller