Las davosas perditgas

Fin ussa han ins anc pudì discurrer cun els ed ellas – las perditgas che han survivì il holocaust. Oz èn mo anc paucas pli en vita e prest na datti naginas perditgas pli.

Restar restan lura nundumbraivlas intervistas – documents da film, tun u text. Questas intervistas stattan en il center da l'exposiziun «Ende der Zeitzeugenschaft» en il Museum giudaic a Hohenems en il Vorarlberg – damanaivel dal cunfin svizzer.

Las intervistas èn quai che resta, sche las perditgas na san betg prender sezzas il pled. Ma co èsi da contemplar quest'ierta? L'exposiziun na sa fatschenta betg mo cun il cuntegn dals raquints da las perditgas. Anzi, ella sa deditgescha era a la dumonda co che las intervistas èn vegnidas fatgas, tge intenziuns che stattan davostier – tant dals raquintaders sco dals intervistaders. Numnadamain mintga intervista è era in'inscenaziun.

L'exposiziun actuala è anc averta fin ils 13 davrigl.

Contribuziuns

  • Pled sin via da Marianne Strub

  • Las davosas perditgas

Redacziun: Claudia Cadruvi