Sa transfurmar
En la curt da la chasa da medias da la SRG SSR e da la chasa da la citad da Cuira penda in object d’art da Michel Pfister. Il num da quest: Il transfurmatur.
Igl è in object da metal che sumeglia in dratguir. I pudess era esser la tromba d’in elefant. La fantasia da l’observader lubescha vastas interpretaziuns. Nus enconuschain il transfurmatur ord il mund da la tecnica: el producescha tensiun reciproca. Da tschaiver sa transfurman ils carstgauns en figuras da fantasia. Era questa transfurmaziun evochescha tschertas tensiuns: ins po esser insatgi auter. Quai lubescha da far chaussas betg lubidas en la vita reala. En la vita professiunala daventa la transfurmaziun bunamain chaussa da mintgadi.
Sa transfurmar è dapli che mo renovar e refar, la vaira transfurmaziun pretenda ina midada da schientscha, da tenuta e da cumportament. Il motto da lavur da RTR per 2011 è sa transfurmar. Sin fundament da quai che vegn realisà di per di e sin fundament da las experientschas da nossas collavuraturas e da noss collavuraturs, vulain nus ans transfurmar. Per noss public duai questa transfurmaziun esser udibla, visibla e legibla en noss products da radio, televisiun e multimedia.