Siglir tar il cuntegn
Inhalt

2011 Accents 1

Ils da Sent avevan decidì ina giada duas chaussas – primo, nus vulain daventar refurmads; e secundo, questa decisiun realisain nus pir cura che noss plevon catolic è mort

Roger de Weck sin visita a Cuira

In ami da Sent ch’enconuscha bain l’istorgia da questa vischnanca mirvegliusa m’ha raquintà: Ils da Sent avevan decidì ina giada duas chaussas – primo, nus vulain daventar refurmads; e secundo, questa decisiun realisain nus pir cura che noss plevon catolic è mort. Ina pitschna istorgia grondiusa, perquai che la decisiun da quels da Sent dat perditga dad in’auta civilisaziun. Dad ina vart defendeva la populaziun da la vischnanca sia (nova) persvasiun. Da l’autra vart prendeva ella resguard dad in um vegl cun in’autra persvasiun.

Resguard, numnadamain resguard da la maioritad da la Svizra tudestga per las trais gruppas linguisticas pli pitschnas, quai è ozendi il patratg federalistic. La SRG SSR è in’instituziun da resguard e diversitad. Preschentar quella è sia incumbensa. La SRG ha studios en tuttas quatter regiuns culturalas, mintgamai cun schurnalistas, tecnichers ed auters spezialists ord quella regiun. Las trais regiuns linguisticas grondas han tenor lescha il dretg a programs eguals – la Svizra rumantscha ad ina chadaina da radio ed emissiuns da televisiun. Quest service public exprima la persvasiun che las minoritads duainvegnir tractadas egualmain: l’equiliber dals interess è la basa per la stabilitad en Svizra. Noss pajais ha mo success, perquai ch’el è stabil. Ed el è mo stabil, perquai ch’ins prenda resguard.

Impurtant èn la cuminanza, il barat tranter las culturas, la communitad sur ils cunfins linguistics ora. La SRG ademplescha sco instituziun ina funcziun-clav (e po ademplir quella anc meglier).

La prestaziun da la SRG impressiunescha ord vista dals meds limitads, cumpareglià cun la concurrenza pussanta da l’exteriur. Ed il public onurescha la fidadadad dals programs: il barometer dals quitads da la Credit Suisse, ina retschertga represchentativa, plazza il radio cun in consentiment da 77% e la televisiun cun in da 76% a la testa da las instituziuns fidadas, avant la dretgira federala cun 72% e la polizia cun 70% pertschient.

Radiotelevisiun Svizra Rumantscha lavura cun verva, cun abilitad, cun programs attractivs – cun in team remartgabel. RTR è bler dapli ch’emissiuns da radio e da televisiun: Questa chasa da medias attractiva è in toc confederaziun. RTR signifitgescha ...il patratg federal.

Roger de Weck