Siglir tar il cuntegn

Header

cuntegn

2012 Accents 2

II dat pleds magics. Tuttenina èn els qua.

Innovativ

II dat pleds magics. Tuttenina èn els qua. Vegnan sco da sasez or da las buccas da persunas da la vita publica. Ed er or da las buccas da moderaturas e moderaturs. Nagin na sa propi daco ch’els han tuttenina conjunctura auta e nagin na sa dumonda, tge ch’è propi lur cuntegn e messadi. Innovativ è in da quels. El ha sias ragischs en il latin. Far nov.

Far insatge nov è in act creativ. E tutta creaziun basegna ses temp: per schendrar, madirar, crescher e per racoltar. Innovaziun è pia in process en plirs acts. Jau dovr en quest cas gugent il maletg dals tartuffels: avant che quels pon vegnir racoltads, sto il prà esser preparà e tarschinà bain, igl è da far si eras, scavignar la terra, far bellas retschas gulivas, semnar ils tartuffels da sem in suenter l’auter cun la dretga distanza. Pli tard: far si terratsch, trair ora la rabitscha setga, chavar tartuffels cun grond quità per betg fender ils buns e lura zavrar ils pitschens dals manidels e quels dals gross, ils bels da quels ch’ins dat als portgs.

Innovaziun dovra temp, pazienza e cletg, e la voluntad umana da crear insatge nov. Era novs pleds e novas formulaziuns per betg utilisar semper talas ch’èn isadas.

Artitgels legids il pli savens