Accents 4

Vus en Svizra avais in «Urvertrauen» – ina confidenza che lubescha a vus da far debattas sur da voss’istorgia.

«Confidenza primara, confidenza originara»

In enconuschent da mai, in Casac, oriund dal sid dal Kasachstan, oz burgais da la Germania ed abitant da la Svizra, di a mai sin fundament da las discussiuns publicas sur dal mais tematic ILS SVIZZERS: vus en Svizra avais in «Urvertrauen» – ina confidenza primara, ina confidenza originara che lubescha a vus da far talas debattas sur da voss’istorgia, vossa provegnientscha e voss avegnir social, cultural, economic e politic. Ed el manegia che talas discussiuns possia prestar mo in pajais che haja ina confidenza primara en las instituziuns, en la populaziun ed en sasez.

Jau suppon che mes enconuschent sappia precis da tge ch’el discurra: ses pajais nativ n'ha ni ina memoria collectiva ni in'istorgia communabla ni instituziuns e sistems che tegnan ensemen il stadi e la populaziun, auter che la regurdientscha ad oppressurs, imperialists e dictaturs.

Quai è in bel patratg, forsa schizunt in cumpliment: in «Urvertrauen» en quai che nus essan e quai che nus pudessan circumscriver cun «identitad», era sche nus mettain adina puspè en dumonda quella. In zic dapli «Urvertrauen» en quai che collia nus orizontalmain, ma er en quai che tegna nus verticalmain, quai giavisch jau a nus per l’onn che stat avant porta.