Accents 1

«Far stim»: quai è il motto da lavur da RTR per l'onn 2014.

«Far stim» è ina necessitad professiunala

Quai è il motto da lavur da RTR per l'onn 2014. In tal motto ha ina cumponenta spiertala, forsa schizunt morala. El ha da far cun valurs, finalmain cun ina tenuta ed in cumportament. In tal motto na pon ins betg mesirar cun ils instruments usitads dal management. In superiur na po era betg giuditgar la lavur dal collavuratur mo sin fundament da sia attenziun professiunala e persunala. Na, «far stim» è in’alertadad emoziunala, spiertala ed intellectuala, «far stim» è l’attenziun dal mument, il viv interess per persunas, fatgs, situaziuns e circumstanzas. «Far stim» po esser la marveglia per quel ch’è auter e per quai ch’è auter.

Nua cumenzar cun il «far stim»? Tar sasez, tar l’atgna persuna, tar l’autoreflexiun, tar quai ch’ins na vul betg, mo anc pli impurtant: tar quai ch’ins vul e ch’ins sa responsar: «far stim» da quai che ans muventa internamain. Ord quella perspectiva persunala sa sviluppeschan quellas per il conuman ed il conturn. En la relaziun cun il conuman po il «far stim» sa sviluppar ad ina simpatia ed ad in’empatia, ad ina participaziun, forsa schizunt ad ina cumpassiun.

Ed il terz pass? «Far stim» da quai che curra e passa en noss divers munds. Il cuntrari da «far stim» fiss quai ch’il tudestg circumscriva uschè cler cun «wegschauen».

«Far stim» è ina necessitad professiunala era per schurnalists.