Siglir tar il cuntegn

2014 Accents 2

Questa gasetta da chasa è la davosa per Mariano Tschuor.

Editorial – fegl d’infurmaziun intern ed extern

Quest editorial è mes davos. L’emprim hai jau scrit il mars 2010 per l’emprima ediziun dals Accents. La sceptica ch’ina gasetta da chasa possia avair success en il mund digital da l’internet era gronda. Buns collegas en chasa avevan opponì avertamain manegiond che quai saja tratg ils raps da fanestra or. Jau sun led che nus avain cuntinuà fin il di dad oz ed era led che la societad purtadra, la SRG.R, ha dà ses sustegn cumplain.

Ina tala gasetta da chasa è – ultra da quai ch’ella è in fegl d’infurmaziun intern ed extern – in instrument per crear ina cultura da manaschi che po finalmain gidar a
crear insatge sco ina communitad.

Mes davos editorial è pia in engraziament a las lecturas ed als lecturs, ma er a quellas persunas che han fatg la gasetta. Jau numnel expressivamain Johann Clopath, Erwin Ardüser ed Esther Bigliel. E mes davos editorial è particularmain in salid da bainvegni a mia successura Ladina Heimgartner. Jau hai grond plaschair! Bun viadi, Ladina, bun viadi RTR. Tut il bun e buna accoglientscha tar noss public rumantsch e chapientscha tar quel da las autras linguas en Svizra.

A Vus, audituras, aspectaturs e lecturs dals programs da RTR engraziel jau per il sustegn, per la confidenza e per tut la simpatia.