Dis da divertiment che appartegnan be a las pli giuvnas ed als pli giuvens: per tge uffant n’è quai betg in fervent giavisch? Sco chasa da medias per la Svizra rumantscha che porscha cuntegns audio, video ed online era per ils uffants na dastga RTR betg mancar durant quests dis spezials. Uschia è RTR suenter la festa d'uffants a Cuira e quella a Savognin ils 21/22 da fanadur a la festa d'uffants a Laax cun la finamira da divertir ils pli pitschens da ses public.
Cun RTR e la Lia Rumantscha a la festa d'uffants
L’ultim lieu d’acziun – nua che RTR e la Lia sa preschentan communablamain – è Laax. A la festa d’uffants dals 21 e 22 da fanadur è RTR da la partida cun ina staziun da fotografar. Là pon ils uffants sa travestgir en figuras fabulusas e far ina fotografia ch’els pon prender a chasa sco regurdientscha da quest di magic. Plinavant vegnan en la tenda da paraulas trais giadas al di raquintadas istorgias rumantschas e chantadas chanzuns d’uffants.