Emissiuns d’infurmaziun
«TELESGUARD»
La survista dals eveniments impurtants dal di porscha l’emissiun «Telesguard». Ella rapporta di per di da temas actuals ed eveniments communals, regiunals e chantunals da la politica, economia, cultura, sport e societad. «Telesguard» fa quai da moda cumplessiva cun contribuziuns e blocs da novitads, cun reportaschas live da lieus d’acziun ed intervistas live.
Il 2024 ha RTR era emess l'emissiun da stad «sil punct». Curt, frestg e sin il punct: Da glindesdi – fin venderdi ha RTR era rapportà durant la stad da temas ed eveniments che fatschentan il Grischun.
L’emissiun «Telesguard» ha custà 2.6 milliuns francs l'onn 2024.
«MINISGUARD»
«Minisguard» è l’emissiun per las aspectaturas ed ils aspectaturs giuvens. L’emissiun d’infurmaziun per uffants tematisescha novitads regiunalas, naziunalas ed internaziunalas e rapporta a moda evidenta, chapibla e divertenta dal mund da la politica, economia, sport, cultura e societad. Ils uffants emprendan uschia a moda nuncumplitgada da chapir meglier las novitads ed ils fatgs da la vischinanza e da l’entir mund.
Il «Minisguard» ha custà 454'000 francs l’onn 2024.
«PLED SIN VIA»
«Pled sin via» è in commentari cristian tar ils eveniments dal temp e vegn emess quatter giadas l’onn. I sa tracta d’in commentari persunal, en il qual teologas e teologs tematiseschan fatgs socials e dumondas da la vita individuala. Ord perspectiva cristiana prendan els posiziun tar quels fatgs e collian quella cun atgna savida e spiritualitad.
L'emissiun «Pled sin via» ha custà 9'600 francs l’onn 2024.
Emissiuns da discussiun
«CONTROVERS»
L’emissiun «Controvers» è quai ch’il num empermetta: ina discussiun cuntraversa sur da temas politics, economics e sociopolitics actuals che pertutgan il Grischun e la Svizra rumantscha. Persunas cun differents puncts da vista vegnan a pled. Aspectaturas ed aspectaturs duajan pudair far sezs in’opiniun sin fundament dals fatgs preschentads.
En media ha in’emissiun da «Controvers» custà 15'000 francs l’onn 2024.