RTR sustegna dentant era producziuns estras. En il rom da sia incumbensa per la cultura s’engascha la SRG SSR mintg’onn cun 34 milliuns francs (Pacte 2024-2027) per la co-producziun dals films svizzers. Da quai profiteschan era producentas e producents da films independents che fan films e videos per RTR. Il 2025 è RTR sa participada sur il Pacte de l’audiovisuel cun 407'000 francs a la realisaziun da 8 producziuns da film independentas.
Ina survista detagliada davart l’engaschament da la SRG SSR e RTR en il rom dal Pacte de l’audiovisuel è da chattar qua.
Documentaziuns
«Cuntrasts»
La retscha da films «Cuntrasts» cumpiglia istorgias da la convivenza e dals svilups socials en ed enturn la Svizra rumantscha. Il spectrum tematic è vast. I dat istorgias da gener politic, sociologic, economic, cultural, religius, sportiv e da fatgs divers. Era las furmas en variadas - davent da retschertgas, reportaschas, serias ubain era films che van simplamain a cor datti per mintga gust insatge.
Ina ediziun dals «Cuntrasts» ha custà en media 35'000 francs l’onn 2025. Totalmain ha RTR realisà 37 films da «Cuntrasts».