Collavuraziun naziunala (2016)

Las unitads d'interpresa da la SRG SSR lavuran tant en il mintgadi sco er en numerus projects ed eveniments ensemen.

Ils custs publitgads oz da las emissiuns da televisiun e dals emetturs da radio per l'onn 2016 sa refereschan exclusivamain a la regiun linguistica respectiva. Ultra da quai lavuran las unitads d'interpresa da la SRG SSR – RTR en Svizra rumantscha, SRF en Svizra tudestga, RTS en Svizra franzosa ed RSI en Svizra taliana – tant en il mintgadi da program sco er en numerus projects naziunals, eveniments da sport e festivals ensemen. Quai stretgamain e cun success.

Grafik der Schweiz mit den jeweiligen Logos der Unternehmenseinheiten der SRG SSR Avrir maletg en lightbox.

Legenda da maletgs: La SRG SSR e sias unitads d'interpresa. SRG SSR

La SRG SSR e sias unitads d'interpresa han per exempel purtà cuminaivlamain 5,7 milliuns dals en tut 11 milliuns francs custs totals per la producziun gronda «Gottard». Ils ulteriurs daners èn pervegnids da co-producents esters e da la promoziun dal film.

Ulteriurs exempels d'ina collavuraziun naziunala èn l'emissiun «Eusi Landchuchi»/«Cuisine de chez nous»/«Cucina nostrana» – custs totals da 968 000 francs – il project da doc interactiv DADA DATA – custs totals da 304 000 francs – e l'emissiun dal 1. d'avust producida ensemen – a la quala la SRG SSR e sias unitads d'interpresa èn sa participadas cun var 436 000 francs. Plinavant ha lieu ina stretga collavuraziun sin nivel naziunal en il rom da divers eveniments da sport e festivals – sco per exempel a chaschun da la Fête Fédérale de la Musique 2016, nua che las unitads d'interpresa da la SRG SSR han accumpagnà cun lur program societads da musica da las quatter regiuns linguisticas en lur preparaziuns per la Festa federala da musica a Montreux – cun custs totals da 493 000 francs.

En il sectur dal sport acquista la SSR ils dretgs da transmissiun medials d'eveniments da sport naziunals ed internaziunals ed auters dretgs che tutgan tiers per tut las unitads d'interpresa – cun custs d'en media 51,2 milliuns francs l'onn per ils onns 2013-2016 (guarda p. 32 dal rapport annual 2016 da la SSR).

Finalmain quinta la SRG SSR er cun ina stretga collavuraziun en il mintgadi da program. Bleras redacziuns spezialisadas èn connectadas e barattan emissiuns ed experientschas. La SRG SSR occupa numnadamain er sis co-producents interregiunals che coordineschan la collavuraziun tranter las unitads e sur tut ils vecturs.