Siglir tar il cuntegn

Header

Navigaziun

cuntegn

Custs d'emissiun Collavuraziun naziunala (2018)

Las unitads d'interpresa da la SSR collavuran stretgamain tant en il mintgadi da program sco er a chaschun da numerus projects naziunals ed events da sport. Las suandantas emissiuns ed ils suandants formats èn il resultat dal barat surregiunal.

Ils custs d'emissiuns da televisiun ed ils custs dals emetturs da radio per l'onn 2018 sa refereschan exclusivamain sin la regiun linguistica respectiva. Ultra da quai collavuran las unitads d'interpresa da la SSR stretgamain tant quai che reguarda il program da mintgadi sco er en il rom da numerus projects naziunals e d'events da sport.

Grafik der Schweiz mit den jeweiligen Logos der Unternehmenseinheiten der SRG SSR
Legenda: La SRG SSR e sias unitads d'interpresa. SRG SSR

«Dataland»: RTR, RSI, RTR e SRF tematiseschan la midada digitala
Il november 2018 han RTR, RTS, RSI e SRF realisà ina saira tematica naziunala davart il futur digital da la Svizra. L'element central da l'emissiun da televisiun «Dataland» è stà in film documentar davart ils temas surordinads «l'elavuraziun da datas» e «la pussanza da las datas». Reportaschas curtas da RTR, RSI, RTS e SRF e colliaziuns en directa en las autras regiuns linguisticas han mussà il stan actual da la digitalisaziun en Svizra. Ils temas tractads en las contribuziuns filmicas èn silsuenter era stads l'object da differents discurs d'experts cun spezialists da la politica, l'economia e la cultura. Cun agid dal hashtag #dataland ha er il public pudì far part da la discussiun en las medias socialas. L'emissiun da televisiun da trais uras è vegnida transmessa durant la primetime en tut las quatter regiuns linguisticas. Ella ha custà en total 1,9 milliuns francs.

«SwissSkills 2018»: la fiera da professiuns svizra en il focus
In ulteriur project naziunal, al qual tut las unitads d'interpresa èn sa participadas èn stads ils «SwissSkills 2018». Als «SwissSkills», la pli gronda fiera da professiuns dal mund, han emprendistas ed emprendists sco era persunas che han gist terminà l'emprendissadi preschentà 135 professiuns ed èn sa mesirads en 75 disciplinas professiunalas. La SSR ha accumpagnà l'event da tschintg dis cun differentas contribuziuns e colliaziuns en directa al radio, en la televisiun ed online. La producziun naziunala ha custà 1,4 milliuns francs.

Collavuraziun en ils secturs cultura e divertiment
RTR, RTS, RSI e SRF han era collavurà stretgamain per promover la generaziun giuvna da musicistas e musicists svizzers. Uschia per exempel a chaschun da «Purple Nights» e «8x15» – dus formats da concert innovativs ch'èn vegnids realisads en tut las regiuns linguisticas. Las unitads d'interpresa han en emprima lingia rapportà al radio ed online davart ils dus events da musica. Ils custs per «Purple Nights» han importà en total 1,2 milliuns francs e per il format da musica «8x15» en total 0,6 milliuns francs.

Ulteriurs exempels per la collavuraziun naziunala da SRF, RTS, RSI e RTR è l'emissiun da televisiun «Vier Dörfer – ein Land» / «Quatre villages – un pays» / «4 villaggi – un paese» (1 milliun francs custs totals), l'emissiun da televisiun «Signes» davart la surdadad (0,9 milliuns francs) e l'emissiun per il 1. d'avust producida communablamain che ha custà a las unitads d'interpresa 0,4 milliuns francs.

En il sectur dal sport cumpra la SSR ils dretgs da transmissiun medials d'eveniments da sport naziunals ed internaziunals ed ulteriurs dretgs per tut las unitads d'interpresa. En la perioda 2015-2018 han ils custs importà en media 48 milliuns francs ad onn.