Siglir tar il cuntegn

Header

cuntegn

Custs d'emissiun Collavuraziun naziunala (2019)

Las unitads d'interpresa da la SSR collavuran stretgamain tant en il mintgadi da program sco er a chaschun da numerus projects naziunals ed events da sport. Las suandantas emissiuns ed ils suandants formats èn il resultat dal barat surregiunal.

Ils custs d'emissiuns da televisiun ed ils custs dals emetturs da radio per l'onn 2019 sa refereschan exclusivamain sin la regiun linguistica respectiva. Ultra da quai collavuran las unitads d'interpresa da la SRG SSR stretgamain tant quai che reguarda il program da mintgadi sco er en il rom da numerus projects naziunals e d'events da sport.

Grafik der Schweiz mit den jeweiligen Logos der Unternehmenseinheiten der SRG SSR
Legenda: La SRG SSR e sias unitads d'interpresa. SRG SSR

Las elecziuns dal Cussegl naziunal e dal Cussegl dals chantuns 2019 en il focus
En vista a las elecziuns dal Cussegl naziunal e dal Cussegl dals chantuns ha SRF mess en il center las reportaschas fundadas, discurs publics politics e differentas emissiuns spezialas. En la Svizra franzosa è RTS ì tranter il pievel per sentir il puls dals Romands. Era RSI è ì sin via ed ha discurrì cun studentas e students, giuvenils ed expertas ed experts davart las sfidas actualas e dumandà suenter propostas per soluziuns pussaivlas. RTR ha gì il motto «Ti ed jau faschain politica». La finamira è stada clera: far chapir meglier ils politichers ils basegns e giavischs concrets da las burgaisas e dals burgais. Er il di da las elecziuns ils 20 d'october 2019 han RSI, RTR, RTS e SRF rapportà detagliadamain ed han furnì calculaziuns, analisas, resultats e reacziuns – al radio, en la televisiun ed online. Las contribuziuns en connex cun las elecziuns 2019 han custà en total 3,2 milliuns francs.

Docuficziun «La Dinastia Knie – 100 onns Circus Naziunal» ha custà 2,4 milliuns francs
Per il giubileum da 100 onns dal Circus Knie han RSI, RTR, RTS e SRF realisà in project da televisiun naziunal: ina documentaziun da famiglia en duas parts che sa cumpona da sequenzas fictivas e documentaras sco era da registraziuns d'archiv. Il fil cotschen è stà il svilup dal program da giubileum actual, vi dal qual la famiglia Knie ha lavurà durant sia turnea l'onn 2018. RSI, RTR, RTS e SRF han accumpagnà las preparativas ed han era dà in'egliada davos las culissas dal mintgadi dal circus. En Svizra han en tut 890 000 persunas guardà la docuficziun Knie che ha custà 2,4 milliuns francs.

Fête des Vignerons: teater, musica, saut e folclora tar RSI, RTR, RTS e SRF
Dals 18 da fanadur fin ils 11 d'avust 2019 è sa splegada a Vevey la 12avla ediziun da la Fête des Vignerons. La festa da la vendemia che ha lieu mo mintga 20 fin 25 onns ha carmalà 375 000 visitadras e visitaders da tut la Svizra. Las attracziuns principalas èn stadas las totalmain 20 represchentaziuns en la gronda arena – ina maschaida da teater, musica, saut e folclora. RTS e las autras unitads d'interpresa da la SSR han persequità intensivamain il spectacul ed han emess directamain dal pavigliun da RTS/SSR. Ultra da diversas contribuziuns da radio e televisiun ha RTS era producì la versiun televisiva da la show ch'ins ha pudì vesair ils 27 da fanadur sin RTS, SRF e RSI. L'emissiun dal 1. d'avust è per finir stada in project cuminaivel: ils moderaturs Sven Epiney (SRF), Jean-Marc Richard (RTS), Clarissa Tami (RSI) e Corina Schmed (RTR) han preschentà istorgias extraordinarias e spezialitads da lur regiun linguistica ed han registrà las impressiuns en tun e maletg al Lai da Genevra. Las emissiuns e l'app da l'event producida aposta han custà tut ensemen in milliun francs.

En il sectur dal sport ha la SSR acquistà ils dretg d'emissiun medials d'eveniments da sport naziunals ed internaziunals sco er ulteriurs dretgs appartegnents per tut las unitads d'interpresa. En la perioda 2016–2019 han ils custs muntà en media a 46 milliuns francs l'onn.

Artitgels legids il pli savens

Scrollar a sanestra Scrollar a dretga