Siglir tar il cuntegn

Header

Il team da camera filmescha la cuntrada.
Legenda: RTR
cuntegn

Custs d'emissiun 2020 Films documentars

La retscha da films documentars da RTR «Cuntrasts» consista per 99 pertschient d’atgnas producziuns. Auturas ed auturs èn collavuraturAs da RTR sco era cineasts libers che guardan e mussan la vita en il Grischun e la Svizra rumantscha tras lur camera.

RTR sustegna dentant era producziuns estras. En il rom da sia incumbensa per la cultura s’engascha la SRG SSR mintg’onn cun 32,5 milliuns francs (Pacte 2020-2023) per la co-producziun dals films svizzers. Da quai profiteschan era producentas e producents da films independents che fan films e videos per RTR. 2020 è RTR sa participada sur il Pacte de l’audiovisuel cun 183'500 francs a la realisaziun da tschintg producziuns da film independentas.

Ina survista detagliada davart l’engaschament da la SRG SSR e RTR en il rom dal Pacte de l’audiovisuel è da chattar qua, il link avra en ina nova fanestra.

Documentaziuns

Cuntrasts
Legenda: Cuntrasts: du., 17:25 - 17:45, SRF 1 RTR

«Cuntrasts»

La retscha da films «Cuntrasts» cumpiglia istorgias da la convivenza e dals svilups socials en ed enturn la Svizra rumantscha. Il spectrum tematic è vast. I dat istorgias da gener politic, sociologic, economic, cultural, religius, sportiv e da fatgs divers. Era las furmas en variadas:

I dat las retschertgas, sco quella da la «Zona grischa - pedofilia en il Grischun» u quella davart violenza encunter dunnas en il film «Dachasa en privel».

I dat la reportascha sco quella «Tranter bun e nausch» che mussa il mintgadi da policistAs u quella dal construider dad orglas Arno Caluori durant la revisiun da l'orgla da la chaplutta da Vignogn ula midada da la praschun veglia a la nova en il film «Dal Sennhof a Tignez».

I dat il purtret sco quel cun il pictur/artist Reto Cavigelli u il film «I did it my way» dal musicist da divertiment Arturo Casanova e sia vita per la buna luna u lura il film dubel sur da John Peter Casanova e ses stgazi prezius da films che mussan la vita da mintgadi en la Surselva d'avant 100 onns.

I dat er la seria, sco quest onn quella sut la batgetta d'in virus cun la dumonda «Corona - Tge fa quai cun nus», u la seria en quatter parts davart il process e sfidas da la natiralisaziun «Far Svizzers».

Ed i dat adina puspè films che van simplamain a cor, sco quel cun las schumellinas «En duas fin la fin»u «In'amur che perduna tut» che raquinta da la relaziun cun fargliuns cun in impediment.

Sper ils films documentars datti er anc l'emissiun «Cuntrasts Focus» che tracta in tema, mussa e reflectescha quel a maun da differents aspects ed en pliras contribuziuns. Il tema ha in connex direct ed actual cun il mintgadi en il Grischun e la Svizra rumantscha. Il 2020 p.ex. l'emissiun davart viver cun il luf, respectivamain viver tranter gritta, nunpussanza e fascinaziun.

Ina ediziun dals «Cuntrasts» ha custà en media 27'000 francs l’onn 2020.

Artitgels legids il pli savens

Scrollar a sanestra Scrollar a dretga