Films documentars (2016)

La retscha da films documentars da RTR «Cuntrasts» consista per 99 pertschient d’atgnas producziuns. Auturas ed auturs èn collavuraturAs da RTR sco era cineasts libers che guardan e mussan la vita en il Grischun e la Svizra rumantscha tras lur camera.

RTR sustegna dentant era producziuns estras. En il rom da sia incumbensa per la cultura s’engascha la SRG SSR mintg’onn cun 25,7 milliuns francs (Pacte 2016-2019) per la co-producziun dals films svizzers. Da quai profiteschan era producentas e producents da films independents che fan films e videos per RTR. 2016 è RTR sa participà sur il Pacte de l’audiovisuel cun 185‘000 francs a la realisaziun da tschintg producziuns da film independentas.

Ina survista detagliada davart l’engaschament da la SRG e RTR en il rom dal Pacte de l’audiovisuel è da chattar qua.

Documentaziuns

Bild der Sendung Cuntrasts Avrir maletg en lightbox.

Legenda da maletgs: Cuntrasts: du., 17:25 - 17:45, SRF 1 RTR

«Cuntrasts»

La retscha da films «Cuntrasts» cumpiglia istorgias da la convivenza umana e dals svilups socials en ed enturn la Svizra rumantscha. Sco p.ex. il film “Stgelas en pocas qua”, nua ch’il davos pur da la fracziun da Casti en Val Schons sto prender cumià da ses animals. Ubain il film “Parc Adula – Gea u na” en connex cun la votaziun davart in parc naziunal en Surselva - in film che mussa quant divergentas e tuttina manaivlas che las opiniuns controversas pon esser.

L’emissiun «Cuntrasts Focus» focusescha sin in tema, mussa e reflectescha quel a maun da differents aspects ed en pliras contribuziuns. Il tema ha in connex direct ed actual cun il mintgadi en il Grischun e la Svizra rumantscha.

Quatter giadas l’onn datti l’emissiun «Cuntrasts discurs». Durant questa emissiun raquintan ils giasts or da lur vita. Sin fundament da lur experientscha da la vita han ils giasts da dir insatge che surviva il di.

Ina ediziun dals «Cuntrasts» ha custà en media 27’000 francs l’onn 2016.