Siglir tar il cuntegn

Header

cuntegn

Custs d'emissiun Films documentars (2018)

La retscha da films documentars da RTR «Cuntrasts» consista per 99 pertschient d’atgnas producziuns. Auturas ed auturs èn collavuraturAs da RTR sco era cineasts libers che guardan e mussan la vita en il Grischun e la Svizra rumantscha tras lur camera.

RTR sustegna dentant era producziuns estras. En il rom da sia incumbensa per la cultura s’engascha la SRG SSR mintg’onn cun 27,5 milliuns francs (Pacte 2016-2019) per la co-producziun dals films svizzers. Da quai profiteschan era producentas e producents da films independents che fan films e videos per RTR. 2018 è RTR sa participà sur il Pacte de l’audiovisuel cun 195'000 francs a la realisaziun da tschintg producziuns da film independentas.

Ina survista detagliada davart l’engaschament da la SRG SSR e RTR en il rom dal Pacte de l’audiovisuel è da chattar qua, il link avra en ina nova fanestra.

Documentaziuns

Bild der Sendung Cuntrasts / maletg da l'emissiun Cuntrasts
Legenda: Cuntrasts: du., 17:25 - 17:45, SRF 1 RTR

«Cuntrasts»

La retscha da films «Cuntrasts» cumpiglia istorgias da la convivenza umana e dals svilups socials en ed enturn la Svizra rumantscha. Sco p.ex. il film «La Polaca» che mussa las intenziuns da Grazyna Kulczyk che investescha ferm a Susch en Engiadina – quai che metta bravamain en moviment la vischnanca. Ubain la seria “4x4”, ina collecziun da 16 purtrets filmics che mussan il mintgadi da diversas Rumantschas e Rumantschs sco “ti ed jau”.

L’emissiun «Cuntrasts Focus» focussescha sin in tema, mussa e reflectescha quel a maun da differents aspects ed en pliras contribuziuns. Il tema ha in connex direct ed actual cun il mintgadi en il Grischun e la Svizra rumantscha.

Quatter giadas l’onn datti l’emissiun «Cuntrasts discurs». Durant questa emissiun raquintan ils giasts or da lur vita. Sin fundament da lur experientscha da vita han ils giasts da dir insatge che surviva il di.

Ina ediziun dals «Cuntrasts» ha custà en media 32’000 francs l’onn 2018.